Os ydych yn penderfynu trosglwyddo eich buddion, dylech fod yn ymwybodol o sgamiau posibl yn ymwneud â phensiynau. Mae’n allweddol eich bod yn addysgu eich hun ac yn effro ar bob adeg, er mwyn lleihau’r risgiau a allai godi yn sgil sgamiau yn ymwneud â phensiynau.
Yn aml, mae’r rheiny sy’n ceisio eich twyllo yn gysylltiadau nad ydych yn eu hadnabod a byddant yn ceisio eich cael chi i ymddiried ynddynt trwy wneud honiadau ffug. Mae’n debygol y byddant yn dweud eu bod wedi eu hawdurdodi gan yr Awdurdod Ymddygiad Ariannol, ac yn cyflwyno cyfleoedd deniadol i fuddsoddi pan nad ydych wedi gofyn amdanynt. Eu bwriad yw ceisio cael rheolaeth dros eich pot pensiwn. Mewn amgylchiadau eraill, gallai’r arian gael ei ddwyn yn syth oddi arnoch.
Os yw cynnig yn swnio’n rhy dda i’w gredu, yna mae’n debygol na ddylech ei gredu. Mae rhai o’r arwyddion rhybudd i fod yn effro iddynt yn cynnwys cyfleoedd i fuddsoddi sydd â lefel isel o risg ac enillion uchel, adolygiadau pensiwn “rhad ac ddim”, tactegau gwerthu ymosodol a chynlluniau buddsoddi cymhleth, lle nad yw’n glir ble bydd eich arian yn y pendraw. Os oes rhif nad ydych yn ei adnabod yn eich ffonio ac yn cyflwyno unrhyw gyfleoedd fel hyn i chi, mae bron yn sicr mai sgam ydyw. Wedi dweud hynny, cofiwch, yn dilyn y gwaharddiad ar alwadau diwahoddiad yn 2019, fod llawer o dwyllwyr yn canolbwyntio ar y cyfryngau cymdeithasol nawr i gyrraedd pobl.
Rhywbeth arall y mae twyllwyr yn ei wneud yw gofyn i bobl gyfeirio ffrindiau, aelodau o’r teulu a chydweithwyr atynt. Erbyn y cam yma, mae’r twyllwyr wedi meithrin perthynas dda gyda’u dioddefwr gwreiddiol, sy’n credu eu bod wedi cael gwasanaeth da. Gall sawl blwyddyn fynd heibio cyn iddi ddod yn amlwg fod rhywun wedi colli eu pensiwn. Os cewch eich cyfeirio at rywun gyda’r cyngor y gallant eich helpu gyda’ch pensiwn, byddwch ar eich gwyliadwriaeth a sicrhewch fod y cynghorydd yn dweud y gwir am bwy ydyw.
Sgamiau cyffredin i chi fod yn effro iddynt yw cynlluniau sy’n rhyddhau eich pensiwn yn gynnar a sgamiau adolygu pensiynau. Mae unrhyw gynllun sy’n cynnig eich helpu i ryddhau arian o’ch pensiwn cyn i chi gyrraedd 55 oed, yn sgam, bron yn ddi-os. Yn ogystal, mae sgamiau adolygu pensiynau yn cysylltu â phobl yn annisgwyl gan gynnig adolygu eu pensiwn am ddim. Gallai fod yn alwad ffôn, yn neges e-bost, yn neges destun neu’n gynnig mewn hysbyseb ar-lein. Mae mwyafrif y cwmnïau sy’n cynnig adolygu eich pensiwn yn rhad ac am ddim yn gwmnïau sydd ddim wedi cael eu hawdurdodi gan yr Awdurdod Ymddygiad Ariannol, ond efallai y byddant yn honni eu bod wedi eu hawdurdodi er nad yw hynny’n wir.
Am ragor o wybodaeth am y sgamiau cyffredin hyn, dilynwch y dolenni isod:
Nawr, fwy nag erioed, mae’n bryd bod ar eich gwyliadwriaeth. Mae twyllwyr yn targedu potiau pensiwn yn weithgar yn ystod pandemig y Coronafeirws (Covid-19). Oherwydd natur gyfnewidiol y farchnad stoc yn ystod y pandemig, mae pensiynau wedi teimlo’r effaith ac mae llawer o bobl wedi wynebu anawsterau ariannol. Efallai y bydd rhai’n cael eu temtio i gymryd rhywfaint o’u pensiwn. Fel y dywedwyd yn barod, nid yw hyn yn bosibl cyn cyrraedd 55 oed, fel arfer, ac eithrio mewn achosion o salwch neu lle’r ydych wedi amddiffyn eich oed ymddeol ac mae’n iau na 55 oed. Dylai aelodau sy’n gofyn am ddyfynbris gogyfer â Gwerthoedd Trosglwyddo sy’n Gywerth ag Arian Parod, o gynllun buddion diffiniedig i gynllun cyfraniadau diffiniedig, fod yn arbennig o effro i’r perygl o gael eu twyllo yn ystod Covid-19. Yn yr un modd â’r rhan fwyaf o sgamiau yn ymwneud â phensiwn, mae’r twyllwyr yn addo enillion uchel a risg isel. Os yw rhywun sy’n cynilo yn holi am drosglwyddo eu pensiwn, anogwch nhw i fod yn hynod o ofalus.
Cam 1 – Gwrthodwch unrhyw gynigion annisgwyl
Cam 2 – Gwiriwch i weld pwy yr ydych yn trafod â nhw
Cam 3 – Peidiwch â gadael i unrhyw un eich rhuthro na rhoi pwysau arnoch
Cam 4 – Mynnwch wybodaeth neu gyngor diduedd
Am ragor o wybodaeth am bob un o’r camau hyn, ewch i wefan atal twyll yr Awdurdod Ymddygiad Ariannol.
Gwybodaeth gan y llywodraeth a gwasanaethau cyhoeddus ar-lein.
Yr Adran Gwaith a Phensiynau
Mae Cyllid a Thollau Ei Fawrhydi yn sicrhau y telir y dreth gywir ar yr adeg iawn.
Mae HelpwrArian yn dod â chanllawiau yn ymwneud ag arian a phensiynau at ei gilydd fel ei bod yn haws ac yn gyflymach dod o hyd i’r cymorth iawn. Mae’n dod â chymorth a gwasanaethau tri darparwr canllawiau ariannol a gefnogir gan y llywodraeth, at ei gilydd mewn un man: Y Gwasanaeth Cynghori Ariannol, Y Gwasanaeth Cynghori ar Bensiynau a Pension Wise.
Mae adnoddau rhad ac am ddim fel HelpwrArian neu wefan y Cynllun Pensiwn Llywodraeth Leol yn wych. Gallant eich helpu i feithrin eich gwybodaeth am bensiynau a’ch tywys trwy’r materion pwysig yr ydych yn eu hwynebu wrth i chi ymddeol. Yn hytrach na rhoi arweiniad cyffredinol i chi, bydd Cynghorydd Ariannol Annibynnol yn edrych ar eich amgylchiadau unigol, eich sefyllfa ariannol a’ch nod wedi ymddeol, ac yn cynnig argymhelliad sy’n benodol i’ch sefyllfa bersonol chi. Ni fydd pob un eisiau talu am wasanaeth Cynghorydd Ariannol Annibynnol, ond os ydych yn dymuno talu, yna mae’n hanfodol eich bod yn defnyddio un sydd wedi’i reoleiddio gan yr Awdurdod Ymddygiad Ariannol. Os oes arnoch angen cyngor am drosglwyddo eich cynilion pensiwn, dylech siarad â Chynghorydd Ariannol Annibynnol sydd â chymhwyster yn y maes hwn.
Gallwch ddod o hyd i Gynghorydd Ariannol Annibynnol lleol sydd wedi’i reoleiddio gan yr Awdurdod Ymddygiad Ariannol, trwy ddefnyddio teclyn o’r enw ‘Darganfod ymgynghorydd ymddeoliad’ sydd ar gael gan HelpwrArian.
Am wybodaeth am bensiynau’r wladwriaeth, cysylltwch â’r Gwasanaeth Pensiwn. Gallwch ddarganfod ar ba oed y gallwch hawlio pensiwn y wladwriaeth.
Os oeddech yn aelod o gynllun arall yn y gorffennol, ac rydych wedi colli cysylltiad â nhw, yna dylai’r corff canolog hwn fod yn gallu eich helpu i ddod o hyd iddynt.
Mae’r Rheoleiddiwr Pensiynau yn wylgi pensiynau sy’n sicrhau bod cynlluniau yn cael eu rhedeg yn iawn. Mae hefyd yn amddiffyn aelodau rhag twyll. Gall unrhyw un sy’n pryderu am gynllun ‘chwythu’r chwiban’ wrth y Rheoleiddiwr Pensiynau.
Sefydlwyd yr Ombwdsmon Pensiynau o dan y Ddeddf Pensiynau, ac mae’n gallu ymchwilio i unrhyw gŵyn neu anghydfod neu ffaith gyfreithiol sy’n ymwneud â’ch cynllun pensiwn, a’u pennu.
Y Cynllun Pensiwn Llywodraeth Leol.
Mae’r wefan hon ar gyfer cyflogeion yng Nghymru a Lloegr, ac mae’n rhoi’r wybodaeth ddiweddaraf am y CPLlL newydd sy’n berthnasol er 1 Ebrill 2014.
Adroddiad Blynyddol Y Cynllun Pensiwn Llywodraeth Leol
Yr Adroddiad Blynyddol diweddaraf ar gyfer Y Cynllun Pensiwn Llywodraeth Leol (CPLlL) yng Nghymru a Lloegr.
Chwiliwch am gynghorydd ariannol annibynnol. Sicrhewch eu bod yn deall y CPLlL.
Yr Awdurdod Ymddygiad Ariannol
Gwybodaeth am wasanaethau ariannol y Deyrnas Unedig. Cynnyrch ariannol a chyngor am arbed arian.
Gwefan ariannol hunan-gymorth flaenllaw’r Deyrnas Unedig.
Ewch i’r wefan hon am gyngor am leihau eich costau.
Pwyllgor Pensiynau Llywodraeth Leol
Cymorth i awdurdodau lleol yn eu rôl adnoddau dynol. Maent yn helpu trwy ddarparu cyngor a gwybodaeth arbenigol ar reoli a datblygu pobl mewn llywodraeth leol ac arwain y broses o ffurfio polisïau am rai o’r materion sy’n gysylltiedig â chyflogwyr.
Yr Adran Ffyniant Bro, Tai a Chymunedau
Mae’r adran hon yn gyfrifol am feysydd polisi yr Adran dros Drafnidiaeth, Llywodraeth Leol a’r Rhanbarthau gynt a’r Swyddfa Cabinet.
Mae Age Concern yn cefnogi pob un dros 50 yn y Deyrnas Unedig, gan sicrhau eu bod yn cael y gorau o fywyd. Maent yn darparu gwasanaethau hanfodol, er enghraifft gofal dydd a gwybodaeth. Maent hefyd yn ymgyrchu dros faterion fel gwahaniaethu ar sail oed a phensiynau, ac yn gweithio i ddylanwadu ar farn y cyhoedd a pholisi’r llywodraeth mewn perthynas â phobl hŷn.
Mae’r gwasanaeth Cyngor ar Bopeth yn helpu pobl i ddatrys eu problemau cyfreithiol ac ariannol a phroblemau eraill, trwy ddarparu gwybodaeth a chyngor rhad ac am ddim o dros 3,000 o leoliadau, a thrwy ddylanwadu ar y rheiny sy’n llunio polisïau. Gallwch ddod o hyd i fanylion swyddfeydd Cyngor ar Bopeth lleol trwy fynd i wefan Cyngor ar Bopeth.
Cyngor defnyddiol er mwyn adnabod sgamiau yn ymwneud â phensiynau, a’u hosgoi.